የኢትዮጵያ ቴሌኮሙኒኬሽን ሠራተኞች ማኅበር መጀመሪያ ጥር 8 ቀን 1958 ዓ.ም ተመሠረተ፡፡ እንዲሁም መጋቢት 17 ቀን 1968 ዓ.ም. እንደገና ተደራጅቶ እና ተጠናክሮ ተመስርቷል፡፡ ማህበሩ የሰራተኛውን የስራ ዋስትና እና ደህንነት ለማስጠበቅ፤ ሰራተኛው ምርታማነትን በማሳደግ ከተቋሙ የተሻለ የጥቅም ተጋሪ የሚሆንበትን አቅጣጫ ከማኔጅመንት ጋር በመነጋገር ማስቀመጥ፤ የተቋሙን ራዕይ ፤ ተልዕኮና ዓላማን ለማሳካት ከማኔጅመንት እንዲሁም ከሰራተኛው ጋር በየጊዜው በመመካከር የተሻለ ውጤት እንዲመዘገብ የራሱን አስተዋፅኦ ማድረግ፤ የሰራተኛውን ጥቅማጥቅም ለማስከበርና ከቀደመው የተሻለ መብትና ጥቅም ለማስገኘት በየጊዜው በሁለትዮሽ ላይ የተመሰረተ የህብረት ስምምነት ከማኔጅመንት ጋር በመደራደር እንዲሁም በትክክል ለመፈጸሙ በየደረጃው ክትትል በማድረግ ኢኮኖሚያዊ እና ማህበራዊ ፍላጎታቸው የተሟላ ሰራተኞች እንዲኖሩ ማስቻል፤ እና ሌሎችንም አላማዎች ለማሳካት ይህ ማህበር ተመስርቷል፡፡በዚሁ መሰረት አሁን ላይ ከአስራ ሶስት ሺ በላይ አባላት በማህበራችን በመታቀፍ የተለያዩ ጥቅማጥቅሞችን ከማህበራቸው በማግኘት ላይ ይገኛሉ፡፡
ውድ የማህበራችን አባላት በአለም አቀፍ ደረጃ ማህበራት ሲቋቋሙ የተለያየ አላማን አንግበው መሆኑ ይታወቃል፡፡ የሰራተኛ ማሕበር ደግሞ ከእነዚህ ማህበራት ውስጥ ሲሆን አጠቃላይ አላማውን የሰራተኛውን የስራ ዋስትና ፤ መብቶች እና ጥቅሞችን ማስከበር ብቻ ላይ ሳይወስን አዳዲስ ጥቅማጥቅሞችንም በማስገኘት ሰራተኛውም በምላሹ ለተቋሙ ያለውን ዕውቀት እና ጉልበት በሙሉ ሳይሰስት እንዲሰጥ እና ከፍተኛ የሆነ የባለቤትነት መንፈሥ እንዲያደረጅ ያግዘዋል፡፡ የኢትዮ ቴሌኮም መሰረታዊ ሰራተኞች ማህበር ያለፉትን አርባ አመታት በብዙ ውጣ ውረዶች ውስጥ በማለፍ ዛሬ ላይ ደርሷል ፡፡
የኢትዮ ቴሌኮም መሰረታዊ ሰራተኛ ማህበር ማህበራዊ ኃላፊነቱን ለመወጣት የሚያደርገው ጥረት በየጊዜው እየጨመረ የመጣ ሲሆን ለዚህም የአባላቱ ድርሻ ከፍተኛ በመሆኑ ምስጋና እያቀረብን በቀጣይም ይህንን የጋራ ሃላፊነት የመወጣት ሚና አጠናክረው እንዲቀጥሉ እንጠይቃለን፡፡ በዚህ የማህበራዊ ኃላፊነት ማህበራችን የህብረተሰቡን የልማት ተግባር ለመደገፍ፣ የማህበረሰብ ቀውስ ሲፈጠር፣ በችግርና በተመሳሳይ ክስተቶች ላይ ትኩረት በማድረግ የሚያከናውነው ተግባር ነው፡፡
የማህበሩ አባላት መብት፤ ጥቅምና ደህንነት በማስከበር ማህበራዊና ኢኮኖሚያዊ ፍላጎታቸው እንዲሟላ ምርታማነታቸው እንዲጎለብትና ሰራተኞች ፍትሀዊ ተጠቃሚ እንዲሆኑ በማድረግ የድርጅታችንን ተልዕኮ በአጭር ጊዜ ውስጥ እንዲሳካ በማገዝ በሀገሪቱ ግንባር ቀደም ማህበር መሆን ነው፡፡
